← मागे

कांदेपोहे

नाश्ता · वेळ: २० मिनिटे · ३-४ जण

महाराष्ट्राचा सगळ्यात लाडका नाश्ता — आणि 'बघण्याच्या कार्यक्रमा'चा हक्काचा पदार्थ! पिवळेधमक, मऊ पोहे, त्यात शेंगदाणे, कांदा, कढीपत्ता आणि वर ओलं खोबरं-कोथिंबीर.

साहित्य

  • जाड पोहे — ३ वाट्या
  • कांदा — २ (बारीक चिरलेला)
  • बटाटा — १ (ऐच्छिक, बारीक चौकोनी)
  • शेंगदाणे — पाव वाटी
  • हिरव्या मिरच्या — २-३
  • कढीपत्ता — ८-१०
  • हळद — अर्धा चमचा
  • साखर — १ चमचा
  • लिंबू — १
  • तेल — ३ चमचे
  • मोहरी, जिरं, हिंग
  • ओलं खोबरं, कोथिंबीर, मीठ

कृती

  1. पोहे चाळणीत घेऊन नळाखाली हलकेच धुवा आणि पाणी निथळू द्या. त्यात मीठ आणि साखर मिसळून दहा मिनिटं ठेवा.
  2. कढईत तेल गरम करून शेंगदाणे तळून बाजूला काढा.
  3. त्याच तेलात मोहरी, जिरं, हिंग, कढीपत्ता, मिरच्या घालून फोडणी करा.
  4. कांदा (आणि बटाटा) घालून कांदा पारदर्शक होईपर्यंत परता. हळद घाला.
  5. भिजलेले पोहे आणि शेंगदाणे घालून हलक्या हाताने मिसळा. झाकण ठेवून मंद आचेवर दोन मिनिटं वाफ येऊ द्या.
  6. गॅस बंद करून लिंबू पिळा आणि वरून ओलं खोबरं-कोथिंबीर घालून गरम वाढा.

टिपा

पोहे धुताना फार वेळ पाण्यात ठेवू नका, नाहीतर ते गिच्च होतात.

वरून शेव किंवा डाळिंबाचे दाणे घातले की 'पाहुण्यांचे पोहे' होतात!