← मागे

तहानलेला कावळा

इसापनीती · वयोगट: ३ ते ७ वर्षं

उन्हाळ्याचे दिवस होते. एक कावळा खूप तहानलेला होता. पाणी शोधत तो इकडेतिकडे उडत होता. शेवटी त्याला एका बागेत एक मडकं दिसलं.

मडक्यात पाणी होतं, पण अगदी तळाशी. कावळ्याची चोच तिथपर्यंत पोचेना. तो निराश झाला नाही. त्याने आजूबाजूला पाहिलं — जमिनीवर छोटे छोटे खडे पडले होते.

कावळ्याने एकेक खडा चोचीत उचलून मडक्यात टाकायला सुरुवात केली. खडे वाढत गेले तसं पाणी वर वर येत गेलं. शेवटी पाणी काठापर्यंत आलं आणि कावळ्याने पोटभर पाणी प्यायलं.

तात्पर्य: जिथे इच्छा, तिथे मार्ग. अडचणीत डोकं शांत ठेवून विचार करावा.